قصيدة بعنوان الوضع سيء / للشاعر خالد الريان
الوضع سيىء من يجى ست سنين
ومحطة القطر بتعيط عليكى بجد
أحجز تذاكر سفر وانسى إن احنا متفارقين
وانزل ميعادك كل أول سبت
عابر سبيل ماجبرش , مفصول من الأيام
بيمل خط السير وكاره لأى نظام
وفجأة توصلنى رسالتك الصعبة
جواب صغير كدة . غنوة من أنغام
أهو ده اللى عندى بقى وانا انسحبت خلاص
أنا مش حزين والله . أنا بس مستغرب
معقولة تنسى حنين إحتار مابين اتنين ؟
تبديلة بين ضلعين فى حضن كان شرعى ؟
ومن إمتى كان حبنا بيعمل حساب للناس ؟
ومن إمتى كان القمر بتطفى نوره نجوم ؟
دا أنا . وعنيكى وصورك الصابحة فى الألبوم
كل يوم بالليل مانجبش غير سيرتك
وهتافى لمسيرتك ساعة الوجع بالذات
ملك حروب فى الحب عايش هزيمته ثبات
مجروح غياب الصبح وبنفس جرحه يبات
صحيح قفص صدره إحتله سرب بنات ,,!!!
علاقات من الفاضية وكلها هشة ,,
هفضل أنا وقلبى مالناش غير السيرة
وهتفضلى السيدة صاحبة العشة
ليست هناك تعليقات:
إرسال تعليق